Chen jape men locomotiv-la ap pase.
Administrasyon prezidan Sylven Salnav-la koumanse 14 jwen lanne 1867 e li
fini 19 desanm lanne 1869. Apre yo te fin nonmen Salnave prezidan, eleksyon
lejislative fèt nan peyi-an e anpil reprezantan-yo sete moun prezidan Fab
Nikola Jefra. Nan depatman No-an te gen yon militè jeneral Léon Montas, nèg
save, tout moun te renmen e tout moun te respekte.
Pwoblèm-la Montas te goumen pou prezidan Jefra kont Salnave, lane 1865.
Mwa me lanne 1867 prezidan Salnav mete Montas anba kod epi kofre-l nan
prizon. Pandan cink mwa lane 1867 jeneral Montas mande pou yo jije-li men sa
pa jan-m fèt.
Prezidan Salnav sèvi avèk-li kon yon yoyo nan prizon vil potoprens ak vil
Okap. Madan jeneral Montas voye yon petisyon bay reprezantan la Chamb-yo pou
mande yo de ki previen ak mari-li. Senpati reprezantan-yo nan la majorite
sete pou madan Montas.
Mezanmi, 14 oktob lane 1867 magouyè, tilolit, wangatè, malfektè,
sansave, lougarou, tèt kololo ak medam plezi lanmou nan kay ti-lumyè
wouj-yo, anvayi Palè Lejislatif-la kon band madigra e yo koumanse rele Viv
Salnav aba Lachamb.
Yo fout tout depite-yo deyo Lachamb-la, yo kraze chez ak biro, chire tout
potre istorik-yo, yo bwè kleren, danse, epi kore tout pot Lachamb ak gwo
klou tol. Salnav disoud Lachamb-la.
Kant a pou jeneral Montas jounal Monitè 18 desanm lanne 1867 aprann moun
li te fè wout pou peyi san chapo nan yon prizon vil Okap 5 desanm lanne
1867 apre yon swa dizan atak kè yo te rele apoplexy.
Ala bagay ki fè-m sonje lanne 1950, makak wè maka fè. Lè prezidan
Estime ki te vle prolonje tèm prezidans-li, majorite senatè-yo pat vle,
pami yo papa-mwen, senatè Emil Senlo, senatè Lwi Dejwa. Konstitusyon se
papye, bayonet se fè. Chimè Estime yo detwi batiman Sena-an.
Sa te byen lèd pou prezidan Estime ki te vle rete sou pouvwa-an san
akseptans legal majorite sena-an ki pat vle renouvle manda-li. Malgre
lespri pwogresis Dimase Estime anpil magouy ki pat katolik te fèt sou gouvènman-l.
Se akoz tout chire pit sa-yo yon lot militè politisyen, jeneral Paul Ejen
Maglwa koupe zèb anba pye Titim epi pran pouvwa-an. Sa se la verite. Onè,respè,
sa se yon lot verite.
MEZANMI,
se la ma-p rete pou jodi-an. Na pale denmen si Granmèt la vle.
KAL
http://www.fombrun.com/article.php/20071010I807
